.الموضوع أصبح خطيراً جداً ومثير للغضب فعلاً
أيها الأخوة الكرام أرجو القراءة والفهم وعدم أخذ الموضوع بسطحية لأنة كبير ولا يحتمل الإستهانة
تنتشر وتزيد بشكل مستمر نشر ما يسمى بالمنشورات الدينية أو التي تحث على التدين وفعل الخير أو الأحاديث النبوية إلى آخرة من هذه النوعيات
أولاً وخاصة بالنسبة للأحاديث النبوية أو القدسية
حبدأ كلامي بحديث رسول الله صل الله علية وسلم
"من كذب عليّ متعمداً فليتبوأ مقعده من النار" رواه البخاري و مسلم وغيرهما .
وقال صلى الله عليه وسلم "من حدث عني بحديث يرى أنه كذب فهو أحد الكاذبين" رواه مسلم .
يعني حضرتك انت وهي لما تنشروا حديث بدون تأكد ومعرفة بصحة الحديث وبدون أي وعي لمجرد انك بتنشر حاجة دينية أو جاية على هواك أو هواكي ينطبق عليك الحديثين كما تم ذكرهم ( يعني أحد الكاذبين ...فليتبوأ مقعده من النار )
يجي واحد عامل فيها بيحب التدين ويقولك أصل أنا نيتي خير ومكنتش أعرف
وده ملهوش غير رد واحد عندي ( يا محترم يا متعلم يالى عندك القدرة تبحث عن الصور والبوستات عشان تنشرها ممكن تبحث عن الحديث وتتأكد منه قبل ما تنشرة بلاش حجج فارغة تنم عن الجهل وإن مكنش عندك القدرة على التأكد يبقى بلاش نشر وإلا حتكون زي الى نشر وهو متعمد لأنك لم تتأكد )
والكلام ده مش للأحاديث فقط
= أي منشور بيتكلم عن القرآن والسور ويقولك سورة اية بتعمل ايه ( اتأكد يا بني آدم من مصادر موثوقة الأول لأن مش كل ما ينشر صحيح )
= أي منشور بيتكلم عن أحاديث قدسية ( كثير منها اسرائيليات فإتأكد منها بالله عليك بلاش هدم في الدين بجهلك )
= أي منشور يقولك الشيطان منعك تنشرها ( جتك نيلة ...إرحمونا والنوع ده بالتحديد لازم تتأكد منة بشكل قاطع لأن الغرض منه جمع لايكات وربنا ينتقم من الى بيتاجر ويلعب بالدين )
= المنشورات الى بتعد الحسنات ويقولك هتاخد كام حسنة وكلام غريب كده ( إن مكنش فيها نص وحديث محدد يبقى الكلام ده تقول على الله )
= المنشورات الى بتدخل المواضيع في بعضها وتتكلم عن الحب وخاصة البنات وتذكر المأثورات في حب النبي علية أفضل الصلاة والسلام للسيدة عائشة زوجتة (أحب اقولكم لما تتجوزا ابقوا قولوا الكلام ده لأزواجكم عشان ما تتفهموش ويتفسر الكلام بشكل ملتوي )
وفي النهاية أحب أن أوضح ان الناس الى بتنشر وخلاص دون أي تأكد أنتم أخطر على الدين من أعداءه لأنكم بتدوا أعداء الدين المعاول التى يستخدموها لهدمه والتشكيك به لأنكم بتساعدوا في نشر الأكاذيب لدرجة ان كثير من الناس بيعتقدوا في صحتة من كثرة انتشار المعلومة الخاطئة
انتم بالفعل بتساعدوا على نشر الجهل وبتوضحوا مدى جهلكم وسطحيتكم وتدينكم الزائف بأنكم بتنشورا معلومة دينية أو حديث شريف والأولى نشر الصحيح من الدين وتحري الصدق والدقة في أغلى ما نملك وهو ديننا
أتمنى أن كل من يقرأ كلامي يستوعبه وأن تنصحوا به غيركم
إتقوا الله
ليست هناك تعليقات:
إرسال تعليق