الدراسة في كلية تربية نوعية فنية

لكل الناس الى بتفكر تدخل كلية تربية نوعية فنية

أعتبروها نصيحة او تمهيد لفكرك عشان تاخد قرارك بشكل سليم

أنا عمري ما طلبت ان حد يشير منشوراتي لكن المنشور ده عايزكم تشيروه

1- قسم التربية الفنية مش قسم سهل بنقعد نلعب فيه ونرسم ونلون ( ابسلوتلي ) القسم في 9 مواد عملي غير المواد النظري التربوية بتدرسهم على ترمين يعني الترم الواحد فيه في حدود 4 عملي وزيهم نظري على الأقل

2- المواد العملي بيطلب منك مشاريع تنفذها وبتحتاج وقت ومجهود كبير وغالبا بتاخد كل وقتك يدوب تعرف تنام وتاكل بالعافية وممكن متلحقش تخلص 

3- لو معندكش القدرة على إحتمال انك تقعد 6 ساعات متواصلين مركز في شغلك العملي عشان تطلعة بأحسن صورة ( بلاش تتعب نفسك وتيجي )

4- لو معندكش القدرة انك تستخدم الأدوات زي المناشير والشواكيش والأزاميل وتتعامل مع الخشب والنحاس والألومنيوم وتشد قماش على خشب وتدهنة للتصوير وتشيل جبس وتصب قوالب جبس للنحت ( يبقى متشتكيش وتقعد تشتم في الكلية عشان انت الى اخترت بنفسك محدش جبرك )

5- المصاريف وتكاليف الخامات غالية جداً جداً جداً فلو سمحت لو ملكش في الموضوع ومجرد داخل عشان كلية تلمك يبقى حرام عليك فلوس أهلك الى بتضيعها في خامات وانت ملكش فيها

6- النظري كتير ومش قليل ومطلوب منك زي العملي بالظبط وفيه سقوط ونجاح زي العملي بالظبط فمتفتكرش ان الموضوع بسيط

7- شغل العملي محتاج مجهود بدني وذهني وقوة تحمل فلو صحتك على قدك ومش قادر لو سمحت متحطناش في موقف صعب عشان مفيش استثناءات

8- امتحان القدرات بيقيس قدراتك بشكل مبدئي وده مش معناه انك بيكاسو ولا ليوناردوا دافينشي فلو مستواك متحسنش خلال الدراسة او سقطت لا قدر الله متقولش نجحت في امتحان القدرات ازاي وبسقط بعد كدة ...امتحانات القدرات حماده والدراسة حماده تاني خالص

9- برجع أفكركم تكاليف الخامات في الكلية غاليه جدا جدا جدا جدا

10- من رأي المتواضع ان الى يقدر على الكلية نوعين فقط ...الموهوب .و.المؤدي الجيد ....طبعا الموهوب فاهمينها وعارفينها أما المؤدي الجيد المقصود بيها الطالب الى عنده القدرة انه ينفذ الشغل المطلوب بدقة ومهارة وعنده القدرة على محاكاة العمليات الفنية الى بتتعمل قدامة ويكررها ويقدر يكتسب المهارة اليدوية بسرعة ويزود من دقتة وإتقانة ......معندكش الموهبة او القدرة على الآداء عشان خاطر نفسك ومتتعذبش في الكلية بلاش أحسن وممكن يكون مكانك في كلية تانية أفضل ( حقوق ...تجارة ....آداب )

11- هفكركم تاني الخامات غالية جدا جدا جدا جدا وبتيجوا تعيطوا وتدعوا علينا وتحسبنوا وإحنا ملناش دعوة وأديني حذرتكم

12- الخامات مش غالية وبس..... كمان ممكن بتكون نادرة في السوق في أسيوط ولازم تلف وتدور وتتصرف وتجيبها

13- المواصلات ....اعمل حسابك انك هتركب مواصلات وانت شايل خامات وأدوات ولوحات كبيرة عشان تيجي بيها الكلية يعني الموضوع مش انك هتروح الكلية بكراسة رسم وعلبة الألوان الفلوماستر ( الكلام ده في الحضانة )

14- الكلام الى فوق ده وصف بسيط للى هتشوفه في الكليه ....على رأي تامر حسني ( فكر كويس ) والأهم ( فكري كويس ) عشان الموضوع ده بينطبق على البنات زي الولاد بالظبط يعني متجيش بنت تقول أنا بنت ما ينفعش أحط ايدي وأعجن جبس ( لا يا ماما هتعجني جبس وتجهزي طين وهتنشري خشب ...أشغال شاقة من الآخر )

اللهم بلغت اللهم فاشهد